Шалёнага ваўка ліквідавалі хойніцкія міліцыянты ў Барысаўшчыне. Ніхто з мясцовых жыхароў не пацярпеў

Міліцыянты выратавалі вяскоўцаў ад ваўка.

Сёння раніцай у Хойніцкі РАУС паступіла паведамленне: у вёсцы Барысаўшчына воўк спрабуе загрызці сабаку, людзі баяцца выходзіць на вуліцу. 

Па адрасе неадкладна выбыў нарад у складзе ўчастковага інспектара Аляксея Раманава і міліцыянта-кіроўцы аператыўна-дзяжурнай службы Сяргея Чарняўскага.

Па прыбыцці супрацоўнікі для абясшкоджвання жывёлы выкарыстоўвалі агнястрэльную зброю: звера паранілі, але ён уцёк.

Неўзабаве на суседняй вуліцы гэтай жа вёскі воўк зноў напаў на сабаку. Прыцэльнымі стрэламі драпежнік абясшкоджаны. Мясцовыя жыхары і вартавыя парадку не пацярпелі.